PPCBank គាំទ្រដល់មន្ទីរពេទ្យកុមារអង្គរ តាមរយៈការចូលរួមឧបត្ថម្ភ ជា Gold Sponsor នៃកម្មវិធីដើរម៉ារ៉ាតុងរបស់ក្រុមហ៊ុន លី ហួរ គ្រុប

កម្មវិធីនៅក្នុងឆ្នាំនេះ គឺធ្វើឡើងក្រោមប្រធានបទ “ដើររួមគ្នាបង្ហាញក្តីស្រលាញ់សម្រាប់កុមារ និងគាំទ្រសកម្មភាពសប្បុរសធម៌” ក្នុងគោលបំណងកៀរគរប្រមូលថវិកាពីការលក់សំបុត្រ និងការចូលរួមឧបត្ថម្ភផ្សេងៗពីដៃគូសហការ យកទៅបរិច្ចាគជូនដល់មន្ទីរពេទ្យកុមារអង្គរ សម្រាប់បន្តបេសកកម្មរបស់ខ្លួន ក្នុងការព្យាបាលសង្រ្គោះជីវិតកុមារនៅកម្ពុជា។

លោក ញ៉ក់ គឹមស្រូយ នាយកប្រតិបត្តិរងជាន់ខ្ពស់នៃធនាគារ PPCBank មានប្រសាសន៍ថា៖ “ក្នុងនាមជាអ្នកឧបត្ថម្ភមួយរូបនៅក្នុងកម្មវិធីនេះ យើងពិតជាមានសេចក្តីរំភើបរីករាយ ដែលបានចូលរួមគាំទ្រក្នុងសកម្មភាពមនុស្សធម៌ដ៏មានអត្ថន័យនេះ។ សមិទ្ធិផលរបស់អ្នកដើរ ទាំងអស់នឹងត្រូវបានបំប្លែងទៅជាប្រាក់ ដែលនឹងបរិច្ចាគដោយអ្នករៀបចំទៅកាន់មន្ទីរពេទ្យ ដោយផ្ទាល់ ដើម្បីធានាបានថាកុមារ និងក្មេងជំទង់កាន់តែច្រើនឡើង ទទួលបានការថែទាំសុខភាពដែលពួកគេត្រូវការ ដើម្បីចម្រើនលូតលាស់”។

ជាផ្នែកមួយនៃព្រឹត្តិការណ៍ដ៏សំខាន់នេះ ធនាគារ PPCBank ក៏មានរៀបចំស្តង់ ដើម្បីផ្តល់ប្រឹក្សាយោបល់ហិរញ្ញវត្ថុទាក់ទងនឹងផលិតផល និងសេវាកម្មរបស់ធនាគារ ជូនដល់សាធារណៈជន ជាពិសេសដល់អ្នកដែលបានចូលរួមដើរក្នុងព្រឹត្តិការណ៍នេះផងដែរ។

គួរបញ្ជាក់ថា ព្រឹត្តិការណ៍ “ដើរម៉ារ៉ាតុន”មានការអញ្ជើញចូលរួមពីលោកអ្នកឧកញ៉ា លី ហួរ ប្រធានក្រុមប្រឹក្សាភិបាល ក្រុមហ៊ុន លី ហួរ គ្រុប ព្រមទាំងក្រុមគ្រួសារ បុគ្គលិកធនាគារ PPCBank និងសាធារណជននានា សរុបប្រមាណជាង ១០០០នាក់ ស្ថិតនៅក្នុងទីតាំងបុរីវិមានភ្នំពេញ គម្រោងទី១២។

ការឧបត្ថម្ភសប្បុរសធម៌របស់ធនាគារ PPCBank ក្នុងថ្ងៃនេះ បានសបញ្ជាក់យ៉ាងច្បាស់ អំពីការយកចិត្តទុកដាក់ខ្លាំងរបស់ស្ថាប័នហិរញ្ញវត្ថុចំពោះសកម្មភាពសង្គម។

ធនាគារ PPCBank នៅតែបន្តប្រកាន់ខ្ជាប់នូវការចូលរួមចំណែកលើកកម្ពស់ សុខុមាលភាពកុមារដែលជាទំពាំងស្នងឫស្សីទៅអនាគត ដើម្បីធានាថាកុមារទាំងអស់ ទទួលបានការព្យាបាលប្រកបដោយគុណភាព និងឥតគិតថ្លៃ នៅក្នុងមន្ទីរពេទ្យកុមារអង្គរនេះ តែម្តង៕