ធនាគារ PPCBank ចូលរួមគាំទ្រព្រឹត្តិការណ៍ជិះកង់ដើម្បីបរិស្ថាន និងសុខភាពកុមារ ឆ្នាំទី១០

ការចូលរួមរបស់ធនាគារ PPCBank នៅក្នុងព្រឹត្តិការណ៍នេះ គឺស្របតាមការប្តេជ្ញាចិត្តរបស់ខ្លួន ចំពោះសកម្មភាពទំនួលខុសត្រូវសង្គម ក្នុងការលើកកម្ពស់និរន្តរភាពបរិស្ថាន និងគាំទ្រដល់ សុខុមាលភាពកុមារ។ ធនាគារ PPCBank ជឿជាក់ថា ការជិះកង់ គឺជាមធ្យោបាយធ្វើដំណើរមួយ ដែលនាំមកនូវទាំងសុខភាពល្អ និងបរិស្ថានស្អាត ហើយតាមរយៈការចូលរួមរបស់ខ្លួនក្នុងព្រឹត្តិការណ៍នេះផងដែរ នឹងជួយជំរុញប្រជាពលរដ្ឋ ឲ្យប្រកាន់យកការរស់នៅក្នុងបរិស្ថានដែលមានអនាម័យប្រកបដោយនិរន្តរភាព។

គួរបញ្ជាក់ផងដែរថា ព្រឹត្តិការណ៍នេះធ្វើឡើង ដើម្បីស្វែងរកថវិកាជួយដល់មន្ទីរពេទ្យកុមារអង្គរ ដែលផ្តល់ការថែទាំសុខភាពដោយឥតគិតថ្លៃ និងគុណភាពខ្ពស់សម្រាប់កុមារ។ ព្រឹត្តិការណ៍ឆ្នាំនេះទទួលបានជោគជ័យយ៉ាងត្រចះត្រចង់ ដោយបានប្រមូលផ្តុំអ្នកជិះកង់ មកពីគ្រប់មជ្ឈដ្ឋានចូលរួមគាំទ្រនៅក្នុងបុព្វហេតុដ៏ថ្លៃថ្លានេះ។

ចំពោះការគាំទ្ររបស់ធនាគារ PPCBank សម្រាប់ព្រឹត្តិការណ៍ជិះកង់នេះ គឺស្របជាមួយនឹងជំនឿរបស់ធនាគារ ដែលថាសុខភាពរបស់កុមារគឺជាទ្រព្យដ៏មានតម្លៃ និងជាមូលដ្ឋានគ្រឹះសម្រាប់ការអភិវឌ្ឍប្រទេសជាតិ ព្រមទាំងត្រូវបានកត់សម្គាល់ថាជា ចំណែកមួយក្នុងការចូលរួមលើកកម្ពស់សុខភាពកុមារ ឲ្យកាន់តែប្រសើរ និងជួយជំរុញ កំណើនភ្ញៀវទេសចរខេត្តសៀមរាបផងដែរ៕