ធនាគារភីភីស៊ីប៊ែង បានដាក់សម្ពោធអគារថ្មីមួយនៅសាលាបឋមសិក្សាទន្លេអុំ

ក្នុងអំឡុងពេលជំងឺរាតត្បាតកូវីដ 19 នេះ វិស័យអប់រំបានរងផលប៉ះពាល់ជាខ្លាំង ដូច្នេះហើយការសម្ពោធមួយនេះនឹងជួយសម្រាលកង្វះខាតមួយចំនួនដល់សិស្សសាលាបឋមសិក្សាទន្លេអុំ ទន្ទឹមនឹងការលើកកម្ពស់កម្រិតអក្ខរកម្មកាន់តែច្រើនផងដែរ។

បើតាមសម្តី លោក វិន ឈន​ នាយកសាលាបឋមសិក្សាទន្លេអុំ បានឳ្យដឹងថា “សាលាបានជួបបញ្ហាខ្វះខាតអគារសិក្សានាពេលកន្លងមក ដែលពេលខ្លះ ការបង្រៀនត្រូវធ្វើឡើងនៅក្រោមតង់ ហើយនៅពេលមានភ្លៀងធ្លាក់ម្តងៗ ធ្វើឳ្យរំខានដល់ការរៀនសូត្ររបស់សិស្សទៀតផង” ។

សាលាបឋមសិក្សាទន្លេអុំ ស្ថិតនៅក្នុងឃុំស្រែស្តុក ស្រុកកណ្តៀង ខេត្តពោធិ៍សាត់ ជាតំបន់ដាច់ស្រយាលជាប់នឹងទន្លេសាប ដែលមានចម្ងាយ ២៣ គីឡូម៉ែត្រពីទីរួមខេត្ត។

សិស្សសាលាបឋមសិក្សាទន្លេអុំម្នាក់បាននិយាយថា “ជីវិតសាលារៀននៅទីនេះលំបាកណាស់ ដោយសារយើងខ្វះអគារសិក្សា រាល់ពេលភ្លៀងម្តងៗ ធ្វើឳ្យរំខានដល់ការរៀនសូត្រ និងទទឹកសម្ភារៈសិក្សារបស់ខ្ញុំ។ ខ្ញុំ​សូម​ថ្លែងអំណរគុណ​ដល់​ធនាគារ PPCBank ដែល​បាន​ផ្តល់​អគារ​ថ្មី​នេះ​សម្រាប់​សាលា​របស់ខ្ញុំ​»​។

ដើម្បីលើកកម្ពស់តម្លៃនៃការអប់រំ និងដោះស្រាយតម្រូវការរបស់សិស្សានុសិស្សនៅតំបន់ដាច់ស្រយាល ធនាគារភីភីស៊ីប៊ែង បានបរិច្ចាគថវិកាសរុបចំនួន 61,676 ដុល្លារអាមេរិក សម្រាប់ការសាងសង់អគារសិក្សាថ្មីនេះ ដែលមាន​បន្ទប់​រៀន​ចំនួន​ 5 ជាមួយបណ្តោយ 40ម ​និងទទឹង 9​ម​។ ពិធីប្រគល់នេះមានការចូលរួមពីមេឃុំស្រែស្តុក នាយកសាលា លោកគ្រូ អ្នកគ្រូ និងសិស្សានុសិស្ស សមាជិកសហគមន៍មូលដ្ឋាន ព្រមទាំងបុគ្គលិករបស់ធនាគារ PPCBank ។

ធនាគារភីភីស៊ីប៊ែង នៅតែប្តេជ្ញាចិត្តក្នុងការចូលរួមសកម្មភាពសង្គមជាច្រើនទៀតនៅក្នុងប្រទេសកម្ពុជា ខណៈដែលយើងនៅតែបន្តរួមចំណែកដល់ការអភិវឌ្ឍន៍ប្រទេស និងធ្វើការដើម្បីការផ្លាស់ប្តូរជាវិជ្ជមាននៅក្នុងសង្គម។